ശ്രീനാരായണ ഗുരുദേവന്റെ തിരുശേഷിപ്പുകൾ ഏറ്റുവാങ്ങാൻ തലശ്ശേരി ഒരുങ്ങുന്നു

 


ശ്രീനാരായണ ഗുരുദേവന്റെ അമൂല്യ തിരുശേഷിപ്പുകൾ തലശ്ശേരി ശ്രീ ജഗന്നാഥ ക്ഷേത്രത്തിലേക്ക് ആനയിക്കുന്നതിനുള്ള ഒരുക്കങ്ങൾ പൂർത്തിയായി വരുന്നു. നവംബർ 22-ന് ഉച്ചയ്ക്ക് രണ്ട് മണിയോടെ ശിവഗിരി മഠത്തിലെ സന്യാസി ശ്രേഷ്ഠരുടെയും താന്ത്രികാചാര്യന്മാരുടെയും കാർമ്മികത്വത്തിൽ ഗുരുദേവൻ ഉപയോഗിച്ചിരുന്ന കട്ടിലും ചാരുകസേരയും കൊയിലാണ്ടി നന്തിയിലെ വീരപഞ്ചേരി അന്നപൂർണ്ണേശ്വരി ക്ഷേത്രത്തിൽ നിന്നും ഏറ്റുവാങ്ങും.

പ്രത്യേകമായി അലങ്കരിച്ച വാഹനത്തിൽ നൂറുകണക്കിന് വാഹനങ്ങളുടെ അകമ്പടിയോടെയാണ് ഘോഷയാത്ര നടക്കുക. ഉച്ചയ്ക്ക് 2.15-ന് നന്തിബസാറിൽ എത്തുന്ന ഘോഷയാത്ര 2.45-ന് പയ്യോളി, 3.45-ന് വടകര, 4.45-ന് മാഹി, 5 മണിക്ക് ഏടന്നൂർ, 5.15-ന് പുന്നോൽ, 5.30-ന് തലശ്ശേരി പഴയ ബസ് സ്റ്റാൻഡ്, 5.45-ന് പുതിയ ബസ് സ്റ്റാൻഡ്, 6 മണിക്ക് മഞ്ഞോടി എന്നിവിടങ്ങളിലെ സ്വീകരണങ്ങൾ ഏറ്റുവാങ്ങി വൈകുന്നേരം 6.30-ന് ശ്രീ ജഗന്നാഥ ക്ഷേത്രത്തിൽ എത്തിച്ചേരും. തുടർന്ന് പ്രമുഖർ പങ്കെടുക്കുന്ന സാംസ്കാരിക സമ്മേളനവും വിവിധ കലാപരിപാടികളും അരങ്ങേറും.

ആഘോഷങ്ങളുടെ മുന്നോടിയായി ചേർന്ന അവലോകന യോഗത്തിൽ ശ്രീ ജ്ഞാനോദയ യോഗം പ്രസിഡന്റ് അഡ്വ. കെ. സത്യൻ അധ്യക്ഷത വഹിച്ചു. ഡയറക്ടർമാരായ സി. ഗോപാലൻ, രാജീവൻ മാടപ്പിടിക, സുധീർ ഏടന്നൂർ, മാതൃസമിതി അധ്യക്ഷ രമാഭായ് ടീച്ചർ, സെക്രട്ടറി സീന സൂർജിത്ത് എന്നിവർ സംസാരിച്ചു. ചാലക്കര പുരുഷു സ്വാഗതവും ടി.സി. ദിലീപൻ മാസ്റ്റർ നന്ദിയും പറഞ്ഞു.

Post a Comment

Previous Post Next Post

Join Whatsapp

Advertisement